救国方针|孙中山

救国方针

　　（1924年5月30日，孙中山在上海《中国晚报》演讲。粤语。）

　　诸君，我哋大家系中国人。我哋知道中国几千年来系世界上顶富顶强之国家，知道唔知道呢？但系现在中国系乜嘢嘅情形呢？中国现在就变成系世界上顶贫顶弱嘅国。中国嘅人民出海外嘅，就俾外国人欺负凌辱，看不上一个人样；喺中国内地呢，外国对于我哋嘅政府呢，对于我哋嘅国家呢亦系睇唔起。所以，外国就有意对中国来瓜分呢一说。后来呢，觉得呢个瓜分呢，系好难实行，恐怕因为瓜分中国呢，惹出就各国自己打自己。所以呢，现在各国就协同来商量，要把中国嘅国事嚟共管，大家嚟共管中国，就系呢睇中国唔起，以为中国系不能自己管治中国。

　　诸君，试想想：我哋中国几千年来系世界一个文明嘅国家。几千年前中国最强盛嘅时代，就所谓千邦进贡万国来朝，各国都要拜中国嘅上风。到到今日呢，中国反为系退化，呢个系为乜缘故呢？就系中国从旧满州征服以后，中国人就失了个国家精神。中国亡国于满州二百六十几年呢，中国嘅人民就喺呢二百六十几年之内呢就瞓著觉。所以，中国就政治退化、就文明退化、中国工商业退化，中国总所以到到今日就成为民穷财尽，就变成各国睇唔起。

　　中国堕落到今日呢个地位，我哋做国民嘅要有一种乜嘢嘅感觉呢？我哋对于国家，第一事我哋知道我哋今日之危险，先知道危险呢，我哋要设法子嚟避呢个危险，咁用乜嘢法子嚟避得呢个危险呢？就要大家同心协力嚟赞成革命，用革命嘅方法、用革命嘅主义嚟救中国。革命嘅主义系乜嘢呢？就系我哋嘅三民主义。第一，就系民族主义；第二，民权主义；第三，民生主义，用呢三种嘅主义呢，嚟救中国。呢三种嘅主义呢，我哋嘅大家要留心、要嚟考究。

　　啖从边处能考究得呢个三民主义呢？对于呢个三民主义，我近日在呢个广东高师，每礼拜演说一次㗎。头一个民族主义呢，就演说了六个礼拜就讲完喇；第二个民权主义呢，又演说了六个礼拜讲完喇；第三个民生主义呢，不日再嚟演讲。现在呢个民权主义、民族主义两种呢已经系刻书出嚟。咁所以诸君呢，留心呢个三民主义呢要将我呢个三民主义、呢啲演说，要嚟留心详细嚟读过。

　　呢个三民主义呢系讲得好透澈嘅，系发挥得好精密嘅，里头呢有好多新思想、好多新发明。诸君能读呢个三民主义呢，就晓得用乜嘢方法嚟救国啦。我哋能照住三民主义呢种嘅方法、呢种嘅精神，大家同心协力嚟救国呢，咁就中国就可以反弱为强喇、转贫为富喇，就可以同今日之列强嚟并驾齐驱喇！

虚阁网(Xuges.com)